ಆಗ - ಈಗ

ನಗುವುದಕ್ಕಿಂತ ಅಳುವುದೇ ಹೆಚ್ಚು ಬಾಲ್ಯದಲ್ಲಿಯಾದರೂ 
ಮನಸೊಳಗಿನ ಮುಗ್ಧತೆ ಮಾಸಿರಲಿಲ್ಲ ಸಂತೋಷವಿರುತ್ತಿತ್ತು ಆಗ 

ಅಳುವುದಕ್ಕಿಂತ ನಗುವುದೇ ಹೆಚ್ಚು ಬಾಹ್ಯದಲ್ಲಿಯಾದರೂ 
ಸತ್ಯದ ಜ್ಞಾನ ಅರಿಯುವವರೆಗೂ ಯಾತನೆ ತಪ್ಪಿದ್ದಲ್ಲ ಈಗ !!

-ಸುಬ್ಬು ಪದ್ಮನಾಭ್

ಬೇಡು - ತೋರು

ಬೇಡು ಬೇಡುವುದಾದರೆ
ನಿತ್ಯ ಹರಸುವ
ಬೊಗಸೆ ಕೈಗಳನು

ತೋರು ತೋರುವುದಾದರೆ  
ಪ್ರತಿಫಲ ಬಯಸದಿರುವ
ಕಾಯುವ ಕರುಣೆಯನು

-ಸುಬ್ಬು ಪದ್ಮನಾಭ 

ಬ್ರಹ್ಮ ವಿಷ್ಣು ಮಹೇಶ್ವರ

ಅರಿವೆಂಬ ಗುರು ಮನದೊಳಗೆ ಮೂಡಿಸುವವರಿವರು ಜೊತೆಗೆ ಜನುಮ ನೀಡಿದ ತಾಯಿತಂದೆ ತೀಡಿ ತಿದ್ದಿ ತಿಳಿ ಹೇಳಿದ ಗುರುವೇ ಬ್ರಹ್ಮ ವಿಷ್ಣು ಮಹೇಶ್ವರರೆನಗೆ -ಸುಬ್ಬು ಪದ್ಮನಾಭ್  

ಬ್ರಹ್ಮ ವಿಷ್ಣು ಮಹೇಶ್ವರ

ಅರಿವೆಂಬ ಗುರು ಒಳಗೆ 
ಮೂಡಿಸುವ ಗುರು ಹೊರಗೆ
ಮನಸ್ಸಿನ ಸ್ಥಿರತೆಗೆ ಪ್ರಶಾಂತತೆಗೆ
ಜನುಮ ನೀಡಿದ ತಾಯಿ ತಂದೆಯರೇ 
ಬ್ರಹ್ಮ ವಿಷ್ಣು ಮಹೇಶ್ವರರು ಎನಗೆ !! 

-ಸುಬ್ಬು ಪದ್ಮನಾಭ್

#‎GuruPoornima‬ - ಗುರು ವಂದನೆ

ಒಂದೇ ಸಮ ಕೊಡುವುದೊಂದೇ ಪ್ರಕೃತಿಯ ಕಾಯಕ 
ತೆಗೆದುಕೊಂಡು ಅಷ್ಟಿಷ್ಟು ಉಪಕಾರಿಯಾಗು ಯಾತ್ರಿಕ
ಸರಿತಪ್ಪುಗಳ ಕಲಿಕೆಗೆ ಅರಿವೆಂಬ ಗುರುವಿನ ನೇಮಕ
ಪಡೆದ ಜ್ಞಾನವ ಹಂಚುವುದ ಮರೆಯದಿರು ಮಾಂತ್ರಿಕ
-ಸುಬ್ಬು ಪದ್ಮನಾಭ್

ಗುರುತು

ನಡೆಗೆ ಗುರುತಿರಲಿ 
ನುಡಿಗೆ ಸವಿಯಿರಲಿ  
ಬದುಕಿಗೆ ಅರ್ಥವಿರಲಿ 
ಜೀವನಕ್ಕೆ ಘನವಿರಲಿ 
ನಿನ್ನೊಂದಿಗೆ ನಾನಿರಲಿ !!

-ಸುಬ್ಬು ಪದ್ಮನಾಭ್

ಕನಸು

ಕನಸು ಶುರುವಾದರೆ ಮನಸ್ಸು ಕುಣಿಯುವುದಯ್ಯ
ರಾತ್ರಿ ನಿದ್ದೆಯ ಕನಸು ಮನಸ್ಸಿಗೆ ತ್ರಾಸ ಕೇಳಯ್ಯ
ಇರುಳಿಗೆ ನಿದ್ದೆ ಬಾರದಿರೋ ಕನಸು ಬೇಕಯ್ಯಾ
ಕನಸಿಗೆ ಹಗಲಿರುಳು ದುಡಿಯೇ ಬಾಳು ಬೆಳಕಯ್ಯ
-ಸುಬ್ಬು ಪದ್ಮನಾಭ 

ಅಹಂ

ನನ್ನೊಳಗಿನ ಅಹಂ ಮೆರೆಯುತ್ತಿರೆ
ನಾನು ಬೇರೆ ಕಾಣುವ ಜಗತ್ತು ಬೇರೆ
ಬುದ್ದಿ ಮೀರಿ ಅಹಂ ಆತ್ಮನಲ್ಲಿ ನಿಂತರೆ
ಕಾಣುವ ಹೊರ ಜಗತ್ತೆಲ್ಲವೂ ನನ್ನೊಳಗೆ
-ಸುಬ್ಬು ಪದ್ಮನಾಭ 

ನಾನೆಲ್ಲಿ ನೀನೆಲ್ಲಿ

ವಾರಕ್ಕೊಮ್ಮೆ ಬಿಡುವು ಬೇಕೆನ್ನುವ ನಾನೆಲ್ಲಿ 

ಬಿಡುವಿಲ್ಲದೆ ನಿತ್ಯವೂ  ಲೋಕವ ಬೆಳಗುವ ನೀನೆಲ್ಲಿ

 

ಸುಡುಬಿಸಿಲೆಂದು ಅಡಿಗಡಿಗೂ ಜರೆಯುವ ನಾನೆಲ್ಲಿ 

ಸಮಸ್ತ ಜೀವರಾಶಿಯ ಸಮತೋಲನ ಕಾಯುವ ನೀನೆಲ್ಲಿ 

ಮನದ ನವಿಲು

ಅವಿತ ಭಯ ತೆಗೆ
ಜೀವನ ಪ್ರೀತಿ ಉಗೆ
ಮನದ ನವಿಲು ನಗೆ
ಸನಿಹ ನೀನಿರೆ ಮಿಗೆ

-ಸುಬ್ಬು ಪದ್ಮನಾಭ್

ಒಳ್ಳೆಯ ಮಾತು

ಪ್ರಿಯ  ವಾಕ್ಯ  ಪ್ರಧಾನೇನ

ಸರ್ವೇ ತುಷ್ಯಂತಿ ಜಂತವ: 

ತಸ್ಮಾತ್ ತದೇವ ವಕ್ತವ್ಯಮ್ 

ವಚನೇ ಕಾ ದರಿದ್ರತಾ 

ಒಳ್ಳೆಯ ಮಾತು ಆಡುವುದರಿಂದ ಎಲ್ಲಾ ಜೀವ ಜಂತುಗಳಿಗೆ ಸಂತೋಷವಾಗುತ್ತದೆ 

ಆದ್ದರಿಂದ ಒಳ್ಳೆಯದನ್ನೇ ಯಾವಾಗಲೂ ಮಾತನಾಡುವುದಕ್ಕೆ ದಾರಿದ್ರ್ಯ ಬೇಡ.

ಮುತ್ತು-ರತ್ನಗಳು

ಓ ಮನವೇ ,
ಜೀವನದ ಪರೀಕ್ಷೆಗಳ ಎದುರಿಸದೆ
ಬದುಕಿನ ಪಾಠ ಕಲಿಯಲು ಸಾಧ್ಯವೆ

ನನ್ನ ಅಸಹನೆಗೆ ಪರರನ್ನೂ ನಿಂದಿಸಲಾರೆ 
ಕಷ್ಟ-ಕಾರ್ಪಣ್ಯಗಳು ಎರಗಿದರೆ ನಲುಗಲಾರೆ 

ಕ್ಲಿಷ್ಟ ಅನುಭವಕ್ಕೊಳಪಡದೆ ಪಕ್ವವಾಗುವೆನೇ 
ನ್ಯೂನತೆಗಳ ತಿದ್ದುವ ಕಲಿಕೆ ಬೇಡ ಎನ್ನುವೆನೇ 

ಕಲಿತ ಪಾಠವೇ ಗಳಿಸಿದ ಮುತ್ತು-ರತ್ನಗಳು
ಹಂಚಿಕೊಳ್ಳಲೆಂದೂ ಮರೆಯದಿರು !!

-ಸುಬ್ಬು ಪದ್ಮನಾಭ
4th July 2016